Almennar upplýsingar

NEED er skammstöfun fyrir verkefnið Northern Environmental Education Development project sem á íslensku mætti þýða sem Uppbygging náttúruskóla og umhverfismenntar á norðurslóðum. Verkefnið er fjölþjóðlegt samstarfsverkefni Íslendinga, Finna, Norðmanna og Íra. Norðurslóðaáætlun Evrópusambandsins (Northern Periphery Program 2007-2013) er aðalstyrktaraðili þess.

Markmiðið er að þróa nýjar og frumlegar aðferðir til þess að miðla þekkingu um umhverfi og náttúru  friðlýstra svæða til þeirra ferðamanna, nemenda og annarra aðila sem sækja þau heim eða búa í nágrenni þeirra.

Miðpunktur verkefnisins hér á landi er Vatnajökulsþjóðgarður en svæðinu er skipt í fjögur starfssvæði. Á hverju svæði er myndaður samstarfshópur (klasi) og utan um hvern samstarfshóp heldur ákveðin stofnun. Þekkingarsetur Þingeyinga heldur utan um hópinn á norðursvæði, Þekkingarsetur Austurlands heldur utan um hópinn á austursvæði, Framhaldsskóli Austur-Skaftafellssýslu heldur utan um hópinn á suðursvæði og Kirkjubæjarstofa heldur svo utan um hópinn á vestursvæðinu. Fræðasetur Háskóla Íslands á Hornafirði sér um verkefnastjórn hér á landi.